今期唔知開乜好，口淡淡，講吓女人未必係阿媽的投資方法。
如果將全地球投資者放埋一齊，多數會形成一個「常態分布」(Normal Distribution)，最右邊，總會有一兩個巴菲特李嘉誠，靠投資眼光賺到變首富，最左邊，又必定有人輸突幾十副身家。
如果市場資訊對稱，人人知道咁多，公平競爭鬥眼光鬥心理質素，這個常態分布的投資表現平均數，應該係「零」，有人賺就有人蝕，不過，金融市場的零和遊戲，當然唔會咁公平，因為資訊永遠唔對稱，多數係小部分人贏大錢，大多數人輸剩條底褲。
股神巴菲特出晒名鍾意睇年報，聲稱2003年全世界唔睇好中國巨型國企之時，每股個幾港元投資中國石油(857)一役，就係睇年報睇番來，長江實業(001)主席李嘉誠亦曾經講過，以前鍾意睇年報睇吓人點做生意，睇咗幾千億上市資產回來，自己仲有千幾二千億元私己錢俾細仔買玩具，反而股神成份身家在冇派息的巴郡，餐餐隊漢堡包唔係冇道理的。
幾十年前財經新聞唔多，搵本年報望吓都難，搵到年報又識寶的，可能已經掌握到大量人冇我有的市場資訊，今時今日年報呢類基本資訊已經普及，於是投行賓架呢類正牌財經演員，就會搞到通街結構產品衍生工具，有咁複雜得咁複雜，金融市場的進化，永遠有需要將絕大部分投資者排除於真相之外，咁先可以確保，將大部分人，推向投資表現常態分布的負數區域，1978年的誠哥穿越時空來到2012年的香港，未必睇得明和記黃埔(013)及長江基建(1038)本年報。
惠理集團(806)擺明車馬靠投資搵飯食，年報內第一頁，通常會大大隻數字放幾個亮點認屎認屁，當中真係有意思的，只有兩項，第一個係過去19年「至少經歷7次地區性及全球性金融危機」(而仲未爆煲)，第二項就係「每年造訪公司2,500次」(好勤力咁收集情報)，講緊惠理40名全職芬佬的工作，就係全年頻頻密密咁去訪問上市公司，直接觀察公司業務同時面對面觀察管理層，令自己在資訊不對稱的市場處於強勢一方。
不過，市場資訊相對最平衡對稱的一刻，往往就係金融大災難的時候，因為大部分衰嘢都會現晒形，所以「別人恐懼時貪婪，別人貪婪時恐懼」呢句唔記得咗邊個講的說話，係順叔咁多年所見，散戶最有機會賺錢的投資方法。
睇財經評論、大行報告、股神天書，唔係唔得，不過應該當係刺激思維的方法，跟住人哋貼士追揸沽，就肯定錯晒，不如得閒去圖書館蒲吓，香港天綫、八九六四如果太遙遠，搵番1998年、2008年大股災時的舊報紙，睇睇報紙頭版講乜「重溫」一下、Relive一吓當日的市場氣氛，關關難過關關過，乜嘢股市海嘯金融核爆，地球咪一樣咁轉，到再有類似鏡頭出現的時候，問吓自己有冇勇氣將呢個阿媽係女人，但又最難實行的投資理論付諸行動。
香港人太多投資的衝動，太少理財的觀念，投資同儲蓄查實可以雙線進行，唔係叫你死慳死抵做度叔，而係當係鍛練自己的理財紀律，當係儲「股災基金」都好，點解股災殺到嚟的時候，咁多人零彈藥？
臨尾講多句，寫財經評論，本身是一項搵自己笨的投資，講錯嘢被人鬧到豬頭，唔覺意講中咗，好快就失去市場價值。唔經唔覺，在這裡起壇已經3年，實不相瞞，順叔表面上係個財經茄哩啡，事實上，真係一個財經茄哩啡，寫專欄只係副業興趣，最初一星期一篇500字，到舊年今日餐餐開飯，已經思窮想盡，體力腦力不勝負荷，係時候收爐，今次係財經茄哩啡最後一期。
望番之前的墨汁口水，滴晒汗，幫襯開的熟客應該知道，睇順叔寫嘢唔會發達的，因為得啖笑，唔係妄自菲薄，而係順叔天生鍾意搞笑多過寫財經，未來某日，社會棟樑又好，牛頭角順嫂又好，順叔知道有人因為睇過財經茄哩啡笑到咭咭聲的，順叔都會笑到見牙唔見眼的，祝各位笑口常開。
有緣再會。
(FROM AM730)
沒有留言:
發佈留言